माळेगाव -निवडणूक
माझ्या हातात राज्याचे कृषी, सहकार आणि एक्साईज खातं आहे. तुम्ही मला खुश करा, मी तुम्हाला खुश करतो असं राज्याचे उपमुख्यमंत्री अजित पवारांनी माळेगाव कारखान्याच्या मतदारांना उद्देशून म्हटलं. कारखान्यामध्ये माझं पॅनेल निवडून आलं तर माळेगावला 500 कोटी रुपये देतो असंही ते म्हणाले. येत्या 22 जून रोजी माळेगाव सहकारी साखर कारख्यान्याची निवडणूक होणार असून त्यासाठी अजित पवार शिरवली गावातील मतदारांना संबोधित करत होते.
आता जे आपल्याला विरोध करत आहेत त्यांनी जर कारखाना चांगला चालवला असता तर लोकांनी आम्हाला संधी दिली असती का असा प्रश्न अजित पवारांनी विचारला. ज्या ठिकाणाहून मतदान जास्त होईल त्या ठिकाणचा स्वीकृत संचालक घेणार असं अजित पवार म्हणाले.
काका-पुतण्या पुन्हा आमने-सामने
कारखान्याच्या निवडणुकीच्या माध्यमातून मतदारांना पुन्हा एकदा काका विरुद्ध पुतण्याचा संघर्ष पाहायला मिळणार आहे. बारामती तालुक्यातील राजकारणाचं महत्वाचं केंद्र असलेला माळेगाव सहकारी साखर कारखान्याची 22 तारखेला निव़डणूक होणार आहे. हा स्थानिक प्रश्न असल्याचं सांगत असले तरी शरद पवार स्वत: प्रचारात उतरले आहेत. एकीकडे उपमुख्यमंत्री अजित पवार ब गटातून स्वत: अध्यक्षपदासाठी उभे आहेत तर दुसरीकडे युगेंद्र पवारांच्या नेतृत्वाखाली पॅनलची सगळी सूत्रं स्वत: शरद पवारांनी हाती घेतली आहेत. लोकसभा, विधानसभेनंतर माळेगाव कारखाना निवडणुकीत तिसऱ्यांदा पवार विरुद्ध पवार असा सामना रंगणार आहे.
अजित पवार काय म्हणाले?
तुम्ही मला मते द्या, मी कामे करतो. पूर्वी रस्त्यांची काय अवस्था होती आता काय आहे हे पाहा. जे आडमुठापणाची भूमिका घेत आहेत त्यांना समजावून सांगू. जर त्यांनी ऐकले नाही तर शासकीय कामात अडथळा आणला म्हणून पोलिस हस्तक्षेप करतील.
लाडक्या बहिणीवर काहींनी टीका केली. निवडणुकीचे हे थोतांड आहे असे म्हटले गेले. त्यांना मी वेळच्या वेळी पैसे वेळेवर दिले आहेत. आम्ही योजना बंद करणार नाही.
जिथे मला मतदान जास्त तिथे स्वीकृत संचालक घेणार. काल कॅबिनेट मध्ये आर्टिफिशिअल इंटेलिजन्ससाठी 500 कोटी दिले आहे. माझा 70-75 एकर ऊस असतो. तिथं मी आर्टिफिशिअल इंटेलिजन्सवर काम करणार. मी पुढच्या महिन्यात केंद्रीय कृषिमंत्री शिवराज सिंह चव्हाण यांना घेऊन येणार आहे.
माझी जमीन खाताळपट्टा आणि ढेकळवाडीत आहे. आधी शेतकऱ्यांचे भिजणे काढतो मग माझे भरणे काढतो. मी आधी शेतकरी यांचे भरणे काढतो. काही जण रिव्हॉल्व्हर दाखवतात. जर शेतकऱ्यांना रिव्हॉल्वर दाखवली तर जप्त करेने.
तुम्ही मला खुश करा मी तुम्हाला खुश करेल. माझं पॅनेल निवडून द्या, माळेगावला 500 कोटी रुपये देतो.
कारखान्यातील 60 हजार पोती भिजली असतील तर आता पॅनल मागे घेतो. जर ती भिजली नसतील तर सहकार महर्षी त्यांचे पॅनेल मागे घेणार का? आहे का हिंमत? काहीही थापा मारतात. उद्या सगळ्या उमेदवारांना बोलावणार आहे आणि उद्याच सगळ्यांचे राजीनामे घेणार आहे.
माळेगाव इतका भाव दुसऱ्या कारखान्याला दिला असता तर माझ्या समोर कुणी पॅनेल उभे केले नसते. ते म्हणतात माझं समजून उमजून घ्या. अरे त्यांच नका घेऊ, माझं समजून उमजून घ्या. वय झालं तर आशीर्वाद द्या. तुमच्या काळात काय झालं आठवा.
त्यांनी जर कारखाना चांगला चालवला असता तर लोकांनी आम्हाला कशाला संधी दिली असती. माझ्या हातात सहकार, कृषी, एक्ससाईज खाते आहे.
खराब तांदळापासून इथेनॉल तयार करण्याचा कारखाना माझ्या मुलाने काढला आहे. तिथं जाऊन बघा. तुमच्या काळात कोजनच्या युनिटचे 50 कोटी नुकसान झाले. अण्णा, काका याला जबाबदार कोण?
0 Comments