पुरंदर | माजी आमदार संजय जगतापांना हाताशी धरत भाजपची मोठी राजकीय खेळी ; पुरंदरमध्ये विजय शिवतारेंच्या गडाला सुरूंग, जिल्हा परिषद-पंचायत समितीत शिंदेसेनेला जबर धक्का…

                     

      पुरंदर |प्रतिनिधी 

                           पुरंदर तालुक्यातील जिल्हा परिषद आणि पंचायत समिती निवडणुकांचे निकाल हे सध्या संपूर्ण पुणे जिल्ह्यात चर्चेचा विषय ठरत आहेत. माजी आमदार संजय जगताप यांना हाताशी धरत भाजपने पुरंदरमध्ये जोरदार मुसंडी मारत शिंदे गटाचे आमदार विजय शिवतारे यांच्या गडालाच सुरुंग लावल्याचं चित्र स्पष्टपणे दिसून येत आहे.

विधानसभा निवडणुकीत विजय शिवतारेंनी एकीकडे दिवंगत उपमुख्यमंत्री अजित पवार यांचं आव्हान तर दुसरीकडे तत्कालीन काँग्रेसचे विद्यमान आमदार संजय जगताप यांच्या कडव्या झुंजीचा सामना करत विजय साकारला होता. अत्यंत कठीण परिस्थितीत मिळवलेल्या या विजयाचं तेव्हा सर्वत्र कौतुकही झालं होतं.

मात्र त्यानंतर पुणे जिल्ह्यात आलेल्या राष्ट्रवादी काँग्रेसच्या लाटेमुळे अनेक मोठ्या राजकीय पक्षांसह दिग्गज नेत्यांची धुळधाण झाल्याचं पाहायला मिळालं. या राजकीय उलथापालथीत उपमुख्यमंत्री एकनाथ शिंदे यांच्या शिवसेनेचे आमदार विजय शिवतारे यांचाही गड ढासळल्याचं स्पष्ट झालं आहे.

विधानसभा निवडणुकीनंतर सातत्याने विजय शिवतारेंना त्यांच्या मतदारसंघात पराभवाचे धक्के बसत असल्याचं चित्र आहे. पुणे महापालिका निवडणुकीत त्यांनी स्वतः एन्ट्री घेतली होती. शिंदे गटाच्या शिवसेनेतील सर्व चर्चा, बैठका आणि तिकीट वाटप प्रक्रियेत विजय शिवतारे आघाडीवर होते. पुणे शहराच्या उपनगरांमध्ये त्यांनी पूर्ण ताकद लावली होती. मात्र पुणे महापालिका निवडणुकीत शिंदे गटाच्या शिवसेनेचा पूर्णपणे सुपडा साफ झाला.

त्यापूर्वी सासवड नगरपालिकेच्या निवडणुकीतही भाजपने विजय शिवतारेंना अक्षरशः आसमान दाखवल्याचं चित्र पाहायला मिळालं. या पार्श्वभूमीवर काँग्रेसचे माजी आमदार असलेल्या संजय जगताप यांना भाजपने पुरंदर विधानसभा मतदारसंघातून पक्षप्रवेश दिला. त्यानंतर संजय जगताप हे सातत्याने विजय शिवतारेंसमोर मोठं आव्हान उभं करत असल्याचं दिसून येत आहे.

नगरपालिका निवडणुकीत भाजपने मुसंडी मारत इतिहासात पहिल्यांदाच सासवड नगरपालिकेवर आपला झेंडा फडकवला. त्यानंतर आता जिल्हा परिषद आणि पंचायत समिती निवडणुकांमध्येही भाजपने इतिहास रचला आहे. ज्या मातीत भाजपला कधीही आपला उमेदवार विजयी करता आला नव्हता, त्या मातीत संजय जगताप यांच्या रूपाने भाजपने इतिहासात पहिल्यांदाच जिल्हा परिषद आणि पंचायत समितीमध्ये आपले उमेदवार निवडून आणले आहेत.

उपमुख्यमंत्री एकनाथ शिंदे यांच्या पुणे जिल्ह्यातील राजकारणात विजय शिवतारे यांचं महत्त्व मोठं मानलं जात होतं. मात्र त्यांच्याच गडात एकामागून एक होत असलेले पराभव हे शिंदे गटाच्या शिवसेनेसाठी चिंतेचा विषय ठरत आहेत.

पुरंदर तालुक्यात जिल्हा परिषदेच्या एकूण चार जागा आहेत. मागील निवडणुकीत शिवसेनेने चारपैकी तीन जागा जिंकत पंचायत समितीवरही सत्ता मिळवली होती. मात्र यंदाच्या निवडणुकीत शिंदे गटाच्या शिवसेनेला एकही जागा जिंकता आलेली नाही. भाजप आणि राष्ट्रवादी काँग्रेसने प्रत्येकी दोन जागा जिंकल्या आहेत.

पंचायत समितीमध्ये राष्ट्रवादी काँग्रेसची सत्ता आली असून आठ पैकी चार जागा राष्ट्रवादी काँग्रेसकडे, दोन भाजपकडे आणि दोन शिंदे गटाच्या शिवसेनेकडे गेल्या आहेत. त्यामुळे पुरंदर पंचायत समितीवर राष्ट्रवादी काँग्रेसची सत्ता असणार हे निश्चित झालं आहे.

एकूणच माजी आमदार संजय जगताप यांना सोबत घेत भाजपने पुरंदरमध्ये ऐतिहासिक कामगिरी करत विजय शिवतारेंच्या राजकीय गडाला मोठा धक्का दिला असल्याचं या निकालांमधून स्पष्ट होत आहे.