बारामती : प्रतिनिधी
झुंबा डान्स क्लास आणि जिम व्यवसायासंदर्भात आलेल्या तक्रारीवर पोलिसांकडून कारवाई होऊ नये, यासाठी तब्बल सात लाख रुपयांची लाच मागितल्याचा आरोप असलेल्या बारामती तालुका पोलिस ठाण्यातील हवालदाराला उर्वरित पाच लाख रुपयांची लाच स्वीकारताना लाचलुचपत प्रतिबंधक विभागाने (एसीबी) रंगेहाथ पकडले. मंगळवारी (दि. ८) माळेगाव रोड परिसरातील पीडीसीसी बँकेजवळ ही कारवाई करण्यात आली. यापूर्वी दोन लाख रुपये स्वीकारल्याचा आरोप असून, या कारवाईने बारामती पोलिस दलात खळबळ उडाली आहे.
महेश अंकुश उगले (वय ३६, रा. विमलनाथ अपार्टमेंट, विजयनगर, बारामती) असे एसीबीच्या कारवाईत ताब्यात घेण्यात आलेल्या हवालदाराचे नाव आहे. ते बारामती तालुका पोलिस ठाण्यात कार्यरत होते.
तक्रारीवर कारवाई टाळण्यासाठी सात लाखांची मागणी?
तक्रारदार आणि त्यांच्या पत्नीचा झुंबा डान्स क्लास तसेच जिमचा व्यवसाय आहे. या व्यवसायामुळे काही नागरिकांना त्रास होत असल्याची तक्रार पोलिसांकडे करण्यात आली होती. या तक्रारीवर पोलिस कारवाई होऊ नये, यासाठी संबंधित हवालदाराने तक्रारदाराकडे सात लाख रुपयांची लाच मागितल्याचा आरोप आहे.
या कथित व्यवहारातील दोन लाख रुपये यापूर्वी स्वीकारण्यात आल्याचे तक्रारीत नमूद करण्यात आले आहे. त्यानंतर उर्वरित पाच लाख रुपये देण्याची मागणी करण्यात आली. मात्र, तक्रारदाराने एसीबीकडे याबाबत तक्रार दाखल केली.
पडताळणीनंतर एसीबीचा सापळा
तक्रार प्राप्त झाल्यानंतर एसीबीच्या अधिकाऱ्यांनी लाचेच्या मागणीची पडताळणी केली. पडताळणीदरम्यान लाचेची मागणी झाल्याचे निष्पन्न झाल्यानंतर आरोपीला रंगेहाथ पकडण्यासाठी सापळा रचण्यात आला.
मंगळवारी (दि. ८ सप्टेंबर) माळेगाव रोड परिसरातील पीडीसीसी बँकेजवळ एसीबीचे पथक तैनात होते. ठरल्याप्रमाणे तक्रारदाराने आरोपी हवालदाराकडे पाच लाख रुपयांची रक्कम दिली. दुपारी सुमारे ३ वाजून २ मिनिटांनी रक्कम स्वीकारताच दबा धरून बसलेल्या एसीबीच्या पथकाने कारवाई करत हवालदार उगले यांना रंगेहाथ ताब्यात घेतले.
सात लाखांच्या कथित व्यवहाराने खळबळ.
पोलिसांकडे आलेल्या तक्रारीवर कायदेशीर कारवाई करण्याऐवजी ती टाळण्यासाठी लाखो रुपयांची मागणी केल्याचा आरोप झाल्याने या प्रकरणाची बारामतीत जोरदार चर्चा सुरू आहे. विशेष म्हणजे, एकूण सात लाख रुपयांच्या कथित लाच व्यवहारामुळे या कारवाईकडे नागरिकांचे लक्ष लागले आहे.
पोलिस कर्मचाऱ्यानेच तक्रारीवर कारवाई न करण्यासाठी पैशांची मागणी केल्याचा आरोप झाल्याने पोलिस दलाच्या कार्यपद्धतीवरही प्रश्न उपस्थित होत आहेत.
निलंबनाचे आदेश?
दरम्यान, एसीबीच्या कारवाईनंतर संबंधित हवालदाराला निलंबित करण्याचे आदेश जिल्हा पोलिस अधीक्षकांनी दिल्याची माहिती समोर आली आहे. याबाबतची अधिकृत प्रशासकीय प्रक्रिया सुरू असल्याचे सांगण्यात येत आहे.
या प्रकरणी भ्रष्टाचार प्रतिबंधक अधिनियम, १९८८ मधील कलम ७ अन्वये बारामती शहर पोलिस ठाण्यात गुन्हा दाखल करण्याची प्रक्रिया सुरू असल्याची माहिती एसीबीकडून देण्यात आली आहे.
लाचलुचपत प्रतिबंधक विभाग, पुणे येथील पोलिस निरीक्षक संतोष पाटील यांच्या मार्गदर्शनाखाली एसीबीच्या पथकाने ही कारवाई केली. आरोपीला ताब्यात घेतल्यानंतर पुढील कायदेशीर प्रक्रिया व तपास सुरू आहे.
0 Comments