पुरंदर रिपोर्टर Liveबारामती तालुक्यातील बांदलवाडी गावात पतीने पत्नीच्या चारित्र्यावर संशय घेत तिचा निर्घृण खून केल्याची धक्कादायक घटना उघडकीस आली आहे. ही घटना २५ मे रोजी रात्री ९ वाजण्याच्या सुमारास घडली. या प्रकरणी बारामती शहर पोलिसांनी आरोपी लहू रामा वायकर (वय ४८, रा. बांदलवाडी) याच्यावर खूनाचा गुन्हा दाखल केला आहे.
फिर्यादी भगवान हनुमंत बिस्दवडे (वय ४२, रा. बांदलवाडी) यांनी बारामती शहर पोलिस ठाण्यात दिलेल्या तक्रारीनुसार, त्यांचे दाजी लहू वायकर यांनी त्यांच्या बहिणीवर – संजना लहू वायकर (वय ४०) हिच्यावर चारित्र्याच्या संशयातून धारदार शस्त्राने हल्ला केला. या हल्ल्यात संजनाच्या डोक्यात, कपाळावर आणि चेहऱ्यावर गंभीर स्वरूपाचे वार करण्यात आले.
जखमी अवस्थेत संजनाला तातडीने ससून रुग्णालयात उपचारासाठी दाखल करण्यात आले होते. मात्र उपचार सुरू असतानाच तिचा मृत्यू झाला.
या प्रकरणी पोलिसांनी तातडीने कारवाई करत लहू वायकर याच्याविरुद्ध भारतीय दंड विधानाच्या कलम ३०२ (खून) अंतर्गत गुन्हा दाखल केला आहे. पुढील तपास पोलीस उपनिरीक्षक अशोक राऊत यांच्या मार्गदर्शनाखाली सुरू आहे.
ही घटना संपूर्ण परिसरात खळबळ उडवणारी असून कौटुंबिक वादातून उफाळून आलेल्या हिंसक कृत्याने पुन्हा एकदा महिला सुरक्षिततेचा प्रश्न ऐरणीवर आला आहे.
0 Comments