धर्माबाद । सोमेश स्वामी
धर्माबाद तालुक्यातील मौजे चिंचोली येथे पंधरावा वित्त आयोग निधी व पाणी टंचाई अंतर्गत झालेल्या विकासकामांबाबत गंभीर अनियमितता झाल्याची तक्रार समोर आली आहे. या कामांची सखोल चौकशी केल्याशिवाय संबंधित बिलांचे देयक अदा करू नये, अशी मागणी करण्यात आली आहे.
याबाबत श्री. कामाजी मारोती काळे (रा. चिंचोली, ता. धर्माबाद) यांनी दिनांक १०एप्रिल २०२३ रोजी पंचायत समिती धर्माबाद येथे लेखी तक्रार अर्ज सादर केला होता. त्या अनुषंगाने गटविकास अधिकारी, पंचायत समिती धर्माबाद यांनी संबंधित अधिकाऱ्यांना चौकशीचे आदेश दिले आहेत.
तक्रारीनुसार, चिंचोली गावात पंधरावा वित्त आयोग निधीअंतर्गत विविध विकासकामे करण्यात आली आहेत. मात्र, या कामांमध्ये मोठ्या प्रमाणावर अनियमितता झाल्याचा आरोप करण्यात आला आहे. विशेषतः पाणी पुरवठा व गटारी बांधकामे अत्यंत निकृष्ट दर्जाची झाल्याचे नमूद करण्यात आले आहे. काही ठिकाणी गटारीचे काम अर्धवट राहिले असून, पाण्याचा निचरा व्यवस्थित होत नसल्याने नागरिकांना त्रास सहन करावा लागत आहे.
तसेच, पाणीपुरवठा योजनेअंतर्गत केलेल्या कामांमध्येही त्रुटी आढळून आल्याचे तक्रारीत नमूद आहे. काही भागात पाइपलाइन योग्य पद्धतीने न टाकल्याने पाण्याचा अपव्यय होत असून, गावकऱ्यांना पुरेसा पाणी पुरवठा मिळत नसल्याची तक्रार आहे.
या सर्व बाबींची प्रत्यक्ष पाहणी करून सखोल चौकशी करण्यात यावी आणि दोषी आढळणाऱ्यांवर योग्य कारवाई करावी, अशी मागणी तक्रारदारांनी केली आहे. तसेच चौकशी पूर्ण होईपर्यंत संबंधित कामांचे देयक रोखून ठेवावे, असेही त्यांनी नमूद केले आहे.गटविकास अधिकारी यांनी संबंधित ग्रामपंचायत व अधिकाऱ्यांना याबाबत आवश्यक कागदपत्रे सादर करण्याच्या सूचना दिल्या असून, लवकरच प्रत्यक्ष पाहणी करून अहवाल सादर केला जाणार असल्याची माहिती मिळाली आहे.
दरम्यान, या प्रकरणामुळे चिंचोली गावातील विकासकामांच्या गुणवत्तेबाबत प्रश्नचिन्ह निर्माण झाले असून, ग्रामस्थांमध्ये नाराजीचे वातावरण निर्माण झाले आहे. प्रशासनाने लवकरात लवकर निष्पक्ष चौकशी करून योग्य निर्णय घ्यावा, अशी मागणी ग्रामस्थांकडून होत आहे .
0 Comments