पुरंदर : प्रतिनिधि
पुणे जिल्ह्यातील पुरंदर तालुक्यातील नीरा नदी येथे घाट विकासाचा प्रश्न आता अधिक गंभीर बनला असून, यासाठी थेट मुख्यमंत्री देवेंद्र फडणवीस यांच्याकडे मागणी करण्यात आली आहे. भाजपचे जबाबदारी विस्तारक योगेंद्र माने यांनी अधिकृत पत्राद्वारे हा विषय शासनाच्या निदर्शनास आणून दिला आहे.
या पत्रात नमूद केल्याप्रमाणे, महाराष्ट्र शासनाच्या नियोजन विभागाच्या उच्चाधिकार समिती बैठकीत देहू-आळंदी-पंढरपूर पालखी मार्ग विकास आराखड्याचा आढावा घेतला जात आहे. याच पार्श्वभूमीवर नीरा नदी घाट विकासाचा मुद्दा पुढे आला असून, या कामाचा तीर्थक्षेत्र विकास आराखड्यात समावेश करणे अत्यंत गरजेचे असल्याचे स्पष्ट करण्यात आले आहे.
दरवर्षी संत ज्ञानेश्वर महाराज आणि संत सोपानकाका महाराज यांच्या पालखी सोहळ्यादरम्यान लाखो वारकरी नीरा येथे येतात. मात्र, येथे आवश्यक त्या पायाभूत सुविधा उपलब्ध नसल्यामुळे वारकरी आणि स्थानिक नागरिकांना अनेक अडचणींचा सामना करावा लागत आहे. विशेषतः सुरक्षित स्नानघाट, वाहतूक व्यवस्था, तसेच आपत्कालीन सेवा यांचा अभाव प्रकर्षाने जाणवतो.
पत्र पाठवणारे योगेंद्र माने यांनी आपल्या निवेदनात ठामपणे नमूद केले आहे की, नीरा नदी घाट विकास हे केवळ स्थानिक विकासाचे काम नसून लाखो वारकऱ्यांच्या सुरक्षिततेशी थेट संबंधित आहे. त्यामुळे या कामाचा तीर्थक्षेत्र विकास आराखड्यात तातडीने समावेश करून आवश्यक निधी उपलब्ध करून देणे अत्यावश्यक आहे.
घाट विकास झाल्यास नदीकाठावर सुरक्षित स्नानाची सोय, रस्ते, प्रकाशयोजना, स्वच्छता सुविधा आणि आपत्कालीन सेवा उपलब्ध होणार असून, त्यामुळे मोठ्या प्रमाणावर होणारी गर्दी नियंत्रणात ठेवणे सोपे होईल.
या मागणीला स्थानिक नागरिक, वारकरी आणि सामाजिक कार्यकर्त्यांकडून पाठिंबा मिळत असून, शासनाने यावर तातडीने सकारात्मक निर्णय घ्यावा, अशी अपेक्षा व्यक्त केली जात आहे. नीरा परिसराचा सर्वांगीण विकास आणि वारकऱ्यांची सुरक्षितता लक्षात घेता, हा प्रकल्प लवकरात लवकर मार्गी लागण्याची गरज अधोरेखित होत आहे.
0 Comments